प्रेम जैरु
आमा शब्दको अर्थ सायदै कुनै पनि शब्दकोषमा लेखेर सकिन्न होला, आमा शब्द, शब्दहरूका लागि आफैमा पर्याप्त शब्द हो। जब कुनै पनि प्राणी धर्तीमा जन्म लिन्छ, त्यो बेला पहिलो चोटी नै उसका अनायासै स्वोरले आमा भन्ने शब्दको प्रयोग गरेका हुन्छन।
तिम्रा साना भन्दा साना प्रगतिमा कोहि असाध्यै खुशी हुन्छ भने, तिनी आमा नै हुन। किनकि तिम्रा शुन्यता देखि क्रमशः वृद्धिको जानकार कोहि छिन त आमा नै हुन । तिम्रा कलिला औंलाहरु बढेको थाहा छ तिनिलाइ, बरु अहिले तिमिलाइ ऐना हेर्नू पर्छ अथवा कसैले भन्दिनु पर्छ तिम्रो कपाल बढेछ भनेर तर तिनीलाई राम्रो सँग थाहा हुन्छ कि तिम्रा नंङ र केश कहिले बढ्छ भनेर। तिम्रा खुट्टी जहिल्यै आफ्ना बित्ताले नापि रहन्थिन।
पेट छामि छामी खुवाउथिन कि अघाएउ कि अघाएनौ भनेर । तिम्रो खित्के हाँसो अनि टुल्के आँखा हेरेर नै अघाउन सक्ने आमा। जहिल्यै तिम्रा हात, खुट्टा, कान, नाक, गाला मुसार्दै आफ्ना सारा थकान, भोक, प्यास मेटाउने आमा। आफ्ना सबै इच्छा आकांक्षालाई मारेर सबै भबिस्य तिमिमा देख्ने आमा। डाक्टरले चेक जाँच गर्नु अगाबै थाहा हुन्छ, तिमीलाई के भएको हो भन्ने तिनी नै हुन आमा । तिम्रो मरन च्यासे न्याउरो अनुहार हेरेर तिमिलाइ भोक लागेको छ भन्ने थाहा पाउने तिम्री आमा ।
आज हजारौं शब्द अनि अनेकौं भाषा र घन्टाै बोल्न सक्छौं नि, सम्झ जुन बेला तिमिलाइ एउटा अक्षर उच्चारण गर्न नआउँदा बिहान, बेलुकै बोल्न सिकाउने आमा । सबै आवश्यकताको परिपुर्ति गर्दिने आमा। सबै समस्यको समाधान आमा, बस् तिमिले आँसु झारे पुग्थ्यो जुन तिमिले पाउन सक्थेउ ।
