काठमाडौं । नेपालमा अहिले मौसमी रुघाखोकी सँगै कोरोना कोभिड-१९ को नयाँ भेरियन्टको सङ्क्रमण बढेको सरकारको स्वास्थ्य तथा जनसङ्ख्या मन्त्रालयले जनाएको छ ।
रुघा खोकी लाग्यो भनेर घरमै ओखती गर्दा कोरोनाको सिकार हुने सम्भावना बढेकोले कोभिडको परीक्षण गराउन तथा यसबारे संवेदनशील भई स्वास्थ्य मापदण्डहरू पालना गर्न मन्त्रालयले सचेत गराएको हो ।
मन्त्रालयद्वारा सोमवार जारी विज्ञप्ति अनुसार चैत महिनामा सेम्पलिङ विधिबाट गरिएको २४ वटा पीसीआर जाँचमा २४ वटै नमुनामा ओमिक्रोन भेरियन्टका विभिन्न सङ्क्रमणहरू पाइएको पुष्टि भएको छ ।
कोरोना सङ्क्रमण पुनः फर्केर बढेको पाइएपछि सिमानाकामा आवत जावत गर्ने शङ्कास्पद यात्रुहरूको हेल्प डेस्कमा चेकजाँच गरी पोजेटिभ पाइएकोहरुलाई नजिकको अस्पतालमा उपचार गर्ने व्यवस्था मिलाइएको जनाइएको छ ।
