काठमाडौँ । जनता समाजवादी पार्टी नेपाल (जसपा)मा मन्त्री फेर्नका लागि दबाब बढेको छ । पार्टीभित्र आन्तरिक विवाद चुलिरहेका बेला अध्यक्ष यादवमाथि मन्त्रीहरुको हेरफेरका लागि दबाब बढेको हो ।
आन्तरिक विवादकै बीच दुई पक्षका नेताहरुले आआफ्नो पक्षमा बहुमत पुर्याउन दौडधुप गर्दै आएका छन् ।
जसपा संघीय परिषद्का अध्यक्ष डा.बाबुराम भट्टराईले आफूसँग बहुमत रहेको भन्दै तीव्र दौडधुप गर्दै आएका छन् । यस्तै रक्षात्मक अवस्थामा रहेका यादवले पनि आफ्नो पक्षमा माहोल बनाउन रणनीतिक योजना बनाइरहेका छन् । उनले यो बीचमा सांसदहरुसँग एकपछि अर्को छलफल गर्दै आएका छन् ।
यादवले केही दिन पहिले बानेश्वरस्थित संसद भवनमा पार्टीका सांसदहरुको भेला गरेका थिए । सांसदको मुड थाह पाउनका लागि बोलाइएको बैठकमा बहुमत सांसदले मन्त्री फेर्न सुझाव दिएका थिए । ‘तपाईंले त ६ महिनापछि मन्त्री फेर्ने भन्नुभएको थियो, १० महिना भइसक्यो अहिलेसम्म किन फेर्नुभएन ?’ उनीहरुले भनेका थिए, ‘पार्टीको निर्णय एकातिर कार्यान्वयन अर्कोतिर किन भइरहेको छ ?’
उनीहरुले जसलाई सरकारमा पठाएपनि ढिलाइ भने गर्न नहुनेमा जोड दिएका थिए । जसपाका सांसद सुरेन्द्र यादवले ६–६ महिनामा मन्त्री फेर्ने निर्णय पार्टीमा भएको स्मरण गरे । सो छलफलमा आफूहरुले विगतको निर्णय कार्यान्वयन गराउन आग्रह गरेको बताए । बैठकमा बाबुराम भट्टराई, राजकिशोर यादव, महेन्द्र राय यादवबाहेक सबै सांसद थिए । हाल मन्त्रिपरिषद्मा रहेका रेणु यादव, राजेन्द्र श्रेष्ठ, रामसहाय यादव बाहेकका सबैजनाले एकस्वरमै मन्त्री फेरिनुपर्ने कुरा उठाएका थिए ।
तर अध्यक्ष यादवले यसबारे स्पष्ट जवाफ दिएनन् । उनले अहिले राजनीतिक उथलपुथल अवस्थामा रहेकाले थप छलफल गरि कुनै निर्णय लिने आश्वासन दिएका थिए । पछिल्लो समय मन्त्री फेर्ने कुरा जसपामा यादवका लागि ठूलो टाउको दुखाइको विषय बनेको छ भने संघीय परिषद्का अध्यक्ष भट्टराईका लागि त्यो अवसर बनेको छ । भट्टराई पार्टी कब्जा गर्ने रणनीतिका साथ अघि बढ्दै गर्दा यादवले भने मन्त्रीहरुको हेरफेर पनि नगर्ने बरु भट्टराईलाई रोक्दै पार्टीलाई जोगाउने रणनीतिमा छन् ।
